Hellmut Röhnisch

Hellmut Röhnisch (7ma di aprilo 1914 til 5ma di mayo 1996) esis Germana e Sueda Idisto.

Hellmut Röhnisch esis la filiulo di la Idisto Ewald Röhnisch, qua instruktis Ido ad il. Hellmut Röhnisch edukesis en Kassel (Germania). En 1932 ilu enkarcerigesis kun grupo de amiki di rezisto-movemento. Il sucesis eskapar de judiciala korto e pede atingis Finlando, pos trairir Polonia e Baltika landi. De Finlando il iris a Suedia (Örebro).

Hellmut Röhnisch laboris en Stockholm e Örebro kom jurnalisto. Pos ilua translojo a Örebro il divenis redaktero dil lokala jurnalo Centerbladat (Centro-folio). Hellmut Röhnisch sucesis krear en ca jurnalo specala Ido-pagino kun Idokurso e propagado por la linguo[1].

Hellmut Röhnisch esis mariajita kun la Suediana gimnastikino Margareta Röhnisch (1920/1921-1988). La paro havis un filiino ed un filiulo. Hellmut Röhnisch divenis civitano di Suedia divenis aferisto e fondis fabriko por gimnastikala produkti[2].

En 1945 il divenis l'unesma Sueda championo pri gimnastiko. Il esis judiciero e tradukero ye l'Olimpiadi e mondala championesi til 1988 en Seoul. Il esis honoruma membro di FIG (Federuro di internaciona gimnastiki). Il esis la maxim importanta fabrikisto di sporto-vesti en Suedia ed internacione. Il poslasis al Idisti la Röhnisch-Fonduro en Suedia.

Hellmut Röhnisch elektesis prezidanto dil Sueda Ido-federuro en la yaro 1975 ed esis prezidanto dil Uniono por la Linguo Internaciona Ido inter la 1ma di januaro 1988 til ilua morto ye li 5ma di mayo 1996[3].

Hellmut Röhnisch parolis adminime dek lingui [4]. En plu olda evo il sufris pro diabeto.

Hellmut Röhnisch skribis en diversa Ido-revui multa voyajo-naraci[5]. Dum sua lasta yari la centrala ideo di Hellmut Röhnisch esis ke la Europana Uniono agnoskez Ido kom helpo-linguo di ca organizuro por la komuniko inter la Europana populi[6].

Citaji

En la yaro 1989 Hellmut Röhnisch dicis dum la Ido-konfero 1989 en Thalwill (Suisia):

Depos mea infanteso, me esas idisto, me sempre restis idisto, me restis idisto til mea lasta instanto.[7]

EWALD RÖHNISCH

Ewald Röhnisch (28ma di februaro 1882 til 25ma di julio 1971) esis germana idisto qua esis duktero dil Ido-movado en Germania. Il esis la organzanto dil Ido-konfero 1923 en Kassel.

Ewald Röhnisch divenis Idisto en la yaro 1910. En la yaro 1913 il publikigis en la revuo Die Weltsprache (La Linguo dil Mondo) longa naraci Trans mari. De la diolibro di navala vaporifisto en Ido[1]. Ewald Röhnisch laboris por Ido dum sua tota vivo [2].

L'idisto Hellmut Röhnisch esis la filiulo di Ewald, e lernis Ido de ilu.